ପୁରୀ ବଗଲା ଧର୍ମଶାଳା ବଦଳିବ ଚିତ୍ର

0
766

ପୁରୀ: ଭଙ୍ଗାହେବ ପୁରୀର ପ୍ରସିଦ୍ଧ ବଗଲା ଧର୍ମଶାଳା । ନୂଆ ରୂପରେ ଏଠି ଠିଆ ହେବ ୩ ମହଲାର ଜଗନ୍ନାଥ ବିଶ୍ରାମସ୍ଥଳ। ଦୂରଦୂରାନ୍ତରୁ ଶ୍ରୀକ୍ଷେତ୍ରକୁ ଆସୁଥିବା ଯାତ୍ରୀମାନେ ଏଠାରେ ସୁଲଭ ମୂଲ୍ୟରେ ରହିବାର ସୁବିଧା ପାଇବେ। ବଗଲା ଧର୍ମଶାଳା ସମ୍ପୂର୍ଣ୍ଣ ଭଙ୍ଗାଯାଇ ପ୍ରସାଦ ଯୋଜନାରେ ନିର୍ମାଣ କାର୍ଯ୍ୟ ଖୁବ୍‌ ଶିଘ୍ର ଆରମ୍ଭ ହେବ। ଏଥିପାଇଁ ଆରମ୍ଭ ହୋଇଛି ପ୍ରକ୍ରିୟା । ପୂରାତନ କୋଠା ଭୁଶୁଡ଼ିବା ଅବସ୍ଥାରେ ଥିବାରୁ ଏହାକୁ ଭଙ୍ଗା ଯାଉଛି । ପରେ କେନ୍ଦ୍ରସରକାରଙ୍କ ପ୍ରସାଦ ଯୋଜନାରେ ଆଇଟିଡିସି ପକ୍ଷରୁ ନୂତନ କୋଠା ନିର୍ମାଣ କରାଯିବ। ୩ ମହଲା ବିଶିଷ୍ଟ ଏହି କୋଠା ନିର୍ମାଣ ଲାଗି ଖର୍ଚ୍ଚ ହେବ ୨୧ କୋଟି ଟଙ୍କା । ଏଥିରେ ୩ଟି ବିରାଟ ହଲ ରହିବ ।। ଯେଉଁଥିରେ ଡର୍ମିଟୋରୀ ବ୍ୟବସ୍ଥା ମଧ୍ୟ ରହିବ। କମ ଅର୍ଥ ଦେଇ ଶତାଧିକ ଲୋକ ଏଠି ରହିପାରିବେ। ଏଥିସହ ଏକ ସୁସଂଗଠିତ ପାର୍କିଂସ୍ଥଳ ମଧ୍ୟ ନିର୍ମାଣ କରାଯିବାକୁ ଯୋଜନା ରହିଛି। ମାତ୍ରାଧିକ ଯାତ୍ରୀଙ୍କ ସମାଗମ ଓ ଯାତ୍ରୀଙ୍କ ସୁରକ୍ଷା ଦୃଷ୍ଟିରୁ ଗ୍ରାଉଣ୍ଡ ଫ୍ଲୋରରେ ପାର୍କିଂ ବ୍ୟବସ୍ଥା କରାଯିବ। ପ୍ରଥମ, ଦ୍ୱିତୀୟ ଏବଂ ଦ୍ୱିତୀୟ ମହଲାରେ ଯାତ୍ରୀ ଓ ପର୍ଯ୍ୟଟକ ରହିବେ। ଅତ୍ୟାଧୁନିକ ବ୍ୟବସ୍ଥା ସମ୍ୱଳିତ ଏହି ଅତିଥିଶାଳାରେ ଶତାଧିକ ଯାତ୍ରୀ ରହିପାରିବେ। ଏଥିରେ ବିବାହ ଓ ବ୍ରତ ଭଳି ଉତ୍ସବର ଆୟୋଜନ ବ୍ୟବସ୍ଥା ମଧ୍ୟ ରହିବ। ଧର୍ମଶାଳାରେ ରେଳବିଭାଗ ପକ୍ଷରୁ ଏକ ଟିକଟ କାଉଣ୍ଟର ମଧ୍ୟ ଖୋଲାଯିବ। ସୂଚନାଯୋଗ୍ୟ, ବ୍ରିଟିସ ଅମଳରୁ ଯାତ୍ରୀ ଓ ପର୍ଯ୍ୟଟକଙ୍କ ସୁବିଧା ପାଇଁ ତିଆରି ହୋଇଥିଲା ଏହି ଧର୍ମଶାଳା। କହ୍ନେୟାଲାଲ ବଗଲା ନାମକ ଜଣେ ଶ୍ରଦ୍ଧାଳୁ ଧର୍ମଶାଳା ନିର୍ମାଣ ପାଇଁ ଜମି ଦାନ କରିଥିଲେ।