ବଳାତ୍କାର : ଆଶାରାମ ବାପୁ ଦୋଷୀ

0
779
asharam bapu
asharam bapu
ଯୋଧପୁର : ଆତ୍ମଘୋଷିତ ବାବା ଆଶାରାମ ବାପୁ ଦୋଷୀ ସାବ୍ୟସ୍ତ ହୋଇଛନ୍ତି । ଯୋଧପୁର ସ୍ୱତନ୍ତ୍ର ଅଦାଲତ ମାମଲାର ଶୁଣାଣୀ କରି ଆଜି ଏହି ରାୟ ପ୍ରକାଶ କରିଛନ୍ତି ।  ଆଶାରାମଙ୍କ ୪ ଜଣ ସହଯୋଗୀ ମଧ୍ୟ ଦୋଷୀ ସାବ୍ୟସ୍ତ ହୋଇଛନ୍ତି ।
ଉତ୍ତର ପ୍ରଦେଶର ନାବାଳିକାକୁ ବଳାତ୍କାର କରିବା ମାମଲାରେ ଆତ୍ମଘୋଷିତ ବାବା ଆଶାରାମ ବାପୁ ଦୋଷୀ ସାବ୍ୟସ୍ତ ହୋଇଛନ୍ତି ।  ଗତ ୭ ତାରିଖରେ ବିଚାରପତି ମଧୁସୂଦନ ଶର୍ମାଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣୀ କରି ରାୟକୁ ସଂରକ୍ଷିତ ରଖିଥିଲେ । ରାମ ରହିମର ରାୟ ପ୍ରକାଶ ସମୟରେ ଯେଉଁ ବିଶୃଙ୍ଖଳା ସୃଷ୍ଟି ହୋଇଥିଲା ତାହାକୁ ଦୃଷ୍ଟିରେ ରଖି ରାୟକୁ ୨୫ ତାରିଖ ପର୍ୟ୍ୟନ୍ତ ସଂରକ୍ଷିତ କରି ରଖାଯାଇଥିଲା । ତେବେ ଆଜି ତାହାର ରାୟ ପ୍ରକାଶ ପାଇଛି । ଆଶାରାମଙ୍କ ସହିତ ତାର ଅନ୍ୟ ୪ ସହଯୋଗୀ ଶିବା (ସବାରାମ), ରୋଷେୟା ପ୍ରକାଶ ଦ୍ୱିବେଦୀ, ଶଳ୍ପୀ (ସଂଚିତା ଗୁପ୍ତା), ଶରଦଚନ୍ଦ୍ର (ଶରତଚନ୍ଦ୍ର) ମଧ୍ୟ ଦୋଷୀ ପ୍ରମାଣିତ ହୋଇଛନ୍ତି ।

ସୁରକ୍ଷା ପାଇଁ ଆଶାରାମ ରହୁଥିବା ଯୋଧପୁର କେନ୍ଦ୍ରୀୟ କାରାଗାରାରେ ସ୍ୱତନ୍ତ୍ର ଅଦାଲତ ବସିଥିଲା । ମାତ୍ର ଏହା ପୂର୍ବରୁ ଜେଲ ପରିସର ସହିତ ଯୋଧପୁର ସହରରେ ସୁରକ୍ଷା ବ୍ୟବସ୍ଥାକୁ କଡ଼ା କଡ଼ି କରାଯିବା ସହ ୧୪୪ ଧାରା ଜାରି କରାଯାଇଥିଲା । ଅନ୍ୟ ପଟେ ଉତ୍ତର ପ୍ରଦେଶରେ ପୀଡିତ ପରିବାରର ସୁରକ୍ଷା ବଢାଇ ଦିଆଯାଇଛି । ସହାଜହାନପୁରର କ୍ଷେତ୍ର ଅଧିକାରୀ  କେବି ସିଂହ କହିଛନ୍ତି ଆମେ ପୀଡିତା ଏବଂ ତାଙ୍କର ପରିବାରକୁ ପୁରା ସୁରକ୍ଷା ଯୋଗାଇ ଦେଇଛୁ । ରାୟକୁ ନେଇ ପୋଲିସ ପୁରା ସତର୍କ ରହିଛି ।

ଉଲ୍ଲେଖ ଯୋଗ୍ୟ, ୨୦୧୩ ଅଗଷ୍ଟ ୧୫ରେ ଆଶାରାମଙ୍କ ବିରୋଧରେ ବଳାତ୍କାର ଅଭିଯୋଗ ଆସିଥିଲା । ସହାଜହାନପୁରର ପୀଡ଼ିତା ଯୋଧପୁରର ମନାଇ ଗାଁରେ ସ୍ଥିତ ଆଶ୍ରମରେ ଆଶାରାମଙ୍କ ଉପରେ ବଳାତ୍କାର ଅଭିଯୋଗ ଲଗାଇଥିଲେ । ପୀଡିତା ଦିଲ୍ଲୀରେ ଆଶାରାମଙ୍କ ବିପକ୍ଷରେ ଏତଲା ମଧ୍ୟ ଦେଇଥିଲେ । ଏହା ପରେ ଆଶାରାମଙ୍କୁ ମଧ୍ୟ ପ୍ରଦେଶର ଇନ୍ଦୋରରୁ ଯୋଧପୁର ପୋଲିସ ଗିରଫ କରିଥିଲା । ତେବେଠୁ ଆସାରାମ ଜେଲରେ ଅଛନ୍ତି ।  ଏହି ମାମଲାରେ ଅନେକ ଥର ସ୍ଵାସ୍ଥ୍ୟଗତ କାରଣ ଦର୍ଶାଇ ଜାମିନ ପାଇବା ପାଇଁ ଆଶାରାମ ସୁପ୍ରିମକୋର୍ଟରେ ଆବେଦନ କରିଥିଲେ । ମାତ୍ର ତାଙ୍କୁ କୌଣସି ଆଶ୍ଵସ୍ତି ମିଳିନାହିଁ । ତେବେ ଗତ ୭ ତାରିଖରେ କୋର୍ଟ ଶୁଣାଣି କରି ରାୟକୁ ସଂରକ୍ଷିତ ରଖିଥିଲେ ।